یکشنبه، د چنګاښ ۲۴ : د پښتون ژغورنې غورځنګ مشر منظور پښتین په یوه تازه وینا کې پاکستاني چارواکو ته خبرداری ورکړی چې نور د پښتنو تګ درسره نه کیږي او نور د دغه هېواد اوسني سیاستونه نه شي زغملای.
ښاغلي پښتین د خپلو خبرو په یوه برخه کې ویلي: زه د پاکستان ریاست چارواکو ته هم وایم، داسې ښکاري چې زموږ او تاسو نوره ونه‌شوه، داسې ښکاري، نور دغه حالات چې تاسو جوړوئ پښتانه نور له تاسو سره په دې شرایطو تګ نه‌شي کولای.»
نوموړي پښتنو ته په خطاب کې ویلي: «حوصلې به نه‌بایلئ، همت به نه‌بایلئ، سل زره سرونه قربان وو؛ خو دا وطن ورته نه‌پرېږدو، دا خپله خاوره به آزاده وو.»
پښتین همدارنګه د اکتور په یوولسمه د پښتنو د قومي عدالت جرګې د بللو اعلان کړی او ویلي، چې د پښتنو لږ ترلږه ۴۰ زره استازي به پکې د پاکستان د سیاستونو او خپل وضعیت په اړه خپلې پرېکړې کوي.
هغه په یوه وینا کې پاکستان ته ویلي، چې پر پښتنو یې شل ګوزاره کړي، خو دا ځل به پښتانه منسجم او داسې یو ګوزار وکړي، چې د پښتنو تاریخ او برم به ور په یاد کړي.
نوموړي دغه څرګندونې وروسته له هغه کړې چې د لوی افغانستان ارمانجن او د پښتنو په انقلابي شاعر او ددغه غورځنګ د رهبرۍ شوراپه غړي ګیلامن وزیر په اسلام آباد کې د څو تنو لخوا مرګوني حمله وشوه چې درې وروسته یې په روغتون کې ساه ورکړه او تېره جمعه په وزیرستان کې خاورو ته وسپارل شو. د ښاغلي ګیلامن وزیر په جنازه کې په سل ګونو زره پښتنو برخه اخیستې وه او د افغانستان د بېرغ په اوچتولو سره یې د لر او بر افغان د آزادۍ نارې وهلې.
پاکستاني رسنیو د منظور پښتین پر دغې وینا هم د تل په شان بندیز لګولی او هم یې د ګیله من وزیر د شهادت اړوند ټول خبرونه او اعتراضات نه دي رسنیز کړي.

په داسې حال کې چې د دوحې ددریمې ناستې پرسر دملګرو ملتونو او نورو نړیوالو ادارو سلامشورې لا روانې دي ،اسلامي امارت د دې ناستې لپاره خپله مشروطه اجنډا وړاندې کړه.په قطر کې د اسلامي امارت د سیاسي دفتر مشر سهیل شاهین رسنیو ته په یوه استول شوي پیغام کې ویلي دي چې که نړیواله ټولنه له دوی سره د خبرو له لارې مسایل حل کول غواړي، د دوحې په غونډه کې دې د دوی غوښتنې شاملې کړي.

د هغه په ​​وينا، د فقر له منځه وړل، د کاري فرصتونو رامنځته کول، د اقتصادي پروژو پيلول، د اقليمي بدلونونو سره سمون او په افغانستان کې د کوکنارو د کرکيلې پر وړاندې بديل او په نشه يي توکو د روږدو کسانو درملنه د دوحې د درېيمې ناستې په اجنډا کې د طالبانو له غوښتنو څخه دي.

تردې وړاندې ځینو رسنیو داسې ریپوټونه خباره کړل چې ګنې افغان حکومت د دوحې په ناسته کې د ګډون لپاره نور شرایط وړاندې کړي دي. دهغوی په وینا دتور لیست له منځه وړل،په ملګرو ملتونو کې دافغانستان دڅوکۍ ورسپارل په یادو شرایطو کې شامل وو خو دالومړی ځل دی چې یو مسوول چارواکی د دوحې د دریمې ناستې په اړه داسلامي امارت دریځ څرګندوي.

ټاکل شوی ده ددوحې دریمه ناسته د روان عیسوي کال دجون په دیرشمه نیټه پیل شي خو دافغانستان حکومت لا د ګډون او یا نه ګډون پریکړه نه ده کړې