د افغانستان کرېکټ بورډ غوراوي کمېټې د نهم پړاو شپږیزه لیګ کرېکټ سیالیو لپاره د ټولو لوبډلو نوملړونه اعلان کړل چې پکې یې د مشهورو افغان لوبغاړو د ګډون یادونه هم شوې.
دا لیګ د یوه کال په ځنډ د روانې اګست میاشتې پر ۱۲مه نېټه کابل کې پېلېږي.
په دې کورنیو سیالیو کې لوبډلې په پنځو زونونو وېشل شوې او د کورنیو نویو ځوانانو تر څنګ د ملي لوبډلې لوبغاړي هم د لوبډلو د ترکیب برخه ده.
کرېکټ بورډ ویلي، د افغانستان د ملي لوبډلې د شل اوریزو سیالیو لوبډلمشر راشد خان به د سپین غر زمریانو او د یو ورځنیو سیالیو لوبډلمشر حشمت الله شهیدي به د بند امیر ښامارانو لوبډلمشري کوي.
کابو پنځه کاله کېږي چې راشد خان د افغانستان کورنیو سیالیو کې ګډون نه دی کړی او اوس یې دغو سیالیو کې ګډون ته د ډېرو پام اوښتی دی.
په شل اوریزه بڼه تر سره کېدونکو دغو سیالیو کې په عمومي ډول د افغانستان د کورني کرېکټ پیاوړي لوبغاړي د ملي لوبډلې له مشهورو لوبغاړو سره یو ځای لوبېږي.
تېرو کلونو کې دغو سیالیو ته لوبغاړي د بولیو له لارې هم اخېستل شوي، خو سږ کال د افغانستان غوراوي کمیټې لوبغاړي به بېلابېلو لوبډلو وېشلي دي.
د راشد خان او حشمت الله شهیدي تر څنګ ابراهیم ځدراڼ د ميس عینک اتلانو، رحمت شاه د بوست ساتونکو او عظمت الله عمرزی د امو نهنګانو لوبډلمشران ټاکل شوي دي او د هرې لوبډلې په جوړښټ کې څو نوي لوبغاړي ښکاري.
کرېکټ بورډ محمد نبي، رحمان الله ګوربز، نوین الحق، فضل حق فاروقي او یو شمېر نور لوبغاړي هم چې دا مهال په سوداګریزو لیګونو کې دي، دې سیالو ته غوره کړي دي.
ویل کېږی دوی به ډېر ژر کابل ته ستانه شي.
د تېرو پړاونو شبږیزې لیګ سیالیو کې ځینې بهرني لوبغاړي هم غوره شوي وو، خو په کمسارې بڼه دا ځل پکې هیڅ بهرنی لوبغاړی نشته.
د دې تر څنګ یو شمېر نور افغان لوبغاړي چې ځینې وخت په کورنیو سیالیو کې ښه ځلېدلي هم له پامه غورځول شوې دي.
وفادار مومند، افتاب عالم، عبدالله عادل، شوکت زمان، بهار علي او یو شمېر نور لوبغاړي شته چې په شل اوریزو سیالیو کې کومې لوبډلې ته نه دي غوره شوې او نه یې هم کرېکټ بورډ په اړه څه ویلي.

د شري لنکا د ښځو کرېکټ ملي لوبډلې هند ته په ماتې ورکولو سره د لومړي ځل لپاره د آسیا جام اتلولي ترلاسه کړه.
دغې لوبډلې وکولای شول چې د هند لخوا ورکړل شوی د ۱۶۶ منډو هدف په اسانۍ پوره او اتلولي په خپل نوم کړي.
د هند د ښځو کرېکټ لوبډلې په پایلوبه کې د شپږو لوبغاړو په سوځېدو په ټاکلو شلو اورونو کې ۱۶۵ منډې کړې وې، شري لنکایۍ ښځو دا منډې په ۱۸م اوور کې داسې مهال پوره کړې چې یواځې دوه لوبغاړې یې اوټ شوې وې، او له دې سره یې پایلوبه د اتو وېکټو په توپیر وګټله.
دا په تېرو نهو اتلولیو کې لومړی ځل شو چې د شري لنکا ښځو لوبډله د اسیا جام اتلولي ګټي.
له دې مخکې اووه جامونه هندۍ او ۲۰۱۸م کال کې یوه اتلولي د بنګله دېش ښځو کرېکټ لوبډلې ګټلې.
دا لوبې د شري لنکا په کوربتوب وشوې، د دغه هېواد کرېکټ بورډ اعلان کړی و چې د پایلوبې لېدو ته نندارچیان په وړیا ډول ورتللی شي.
هندۍ لوبډلې د پچې له ګټلو سره لومړی پخپله توپ وهنه کړې او په ټاکلو شلو اورونو کې یې سیالې لوبډلې ته د شپږو وېکټو په زیان د ۱۶۵ منډې جوړې کړې دا په ښکاره لوی هدف و خو شري لنکایۍ لوبغاړو اوږده ملګرتیا وکړه او هدف یې پوره کړ.

د فرانسې پلازمېنې پاریس کې د ۲۰۲۴ کال د المپیک نړېوالې لوبې د پرتمینو مراسمو په ترڅ کې پرانیستل شوې.‌
له شدید باران او د پاریس د اورګاډو په لیکو کې له پراخو ګډوډیو سره سره لسګونه زره کسان د دغو مراسمو لیدو ته راټول شوي وو.
ډېرو ننداچیانو د فرانسې درې‌رنګه او نور ملي بیرغونه رپول. د ‘سن’ سیند د شاوخوا شپږ کیلومترو په اوږدو کې د ډېرو پرتو ودانیو پر کړکیو هم بیرغونه لګول شوي وو.
د ګڼو نورو سندرغاړو او هنروالو منځ کې لیډي ګاګا او ایا ناکامورا هم په ژوندۍ بڼه ننداره وړاندې کړه.‌
دا هر څه په داسې حال کې دي چې د فرانسې استخبارات د هغو کسانو په لټون بوخت دي چې د پاریس د اورګاډو په لیکو کې یې د ګډوډیو په رامنځته کولو سره د اولمپیک لوبو د پرانیستې جشن او مراسم له ستونزو سره مخ کړل.
د فرانسې لومړي وزیر ‘ګابریل اتل’ ویلي، چې پر خلکو د دې ورانکارۍ اغېزه “پراخه” وه.
د یادونې ده چې د ۲۰۲۴ کال د پاریس اولمپیک لوبو د امنیت ساتنې لپاره شاوخوا ۴۵ زره سرتېري ګومارل شوي دي.
پر دې سربېره زرګونه خصوصي امنیتي سرتېري او د پوځ شاوخوا لس زره سرتېري هم د امنیت ساتنې په برخه کې همکاري کوي.
د یادونې وړده چې د المپیک نړېوالې سیالۍ په مېلیونونو مینه وال لري او هرکال په دغو سیالیو کې د بېلابېلو هېوادونو څخه په لسګونو لوبغاړي په مختلفو لوبو کې برخه اخلي .

دوشنبه د چنګاښ ۲۵ : د ۲۰۲۴ کال اروپايي فوټبال اتلولیو پایلوبه کې اسپانیا انګلنډ ته د یو په مقابل کې په دوو ګولونو ماتې ورکړه او دا اتلولي یې وګټله.
د لوبې تر لومړۍ نیمې پورې هېڅ یوه لوبډله و نه توانېده، چې ګول وکړي. خو په ۴۶ دقیقه کې د اسپانیا نیکو ویلیمز توپ د انګلنډ ګول ته ورساوه او لومړی ګول یې وکړ.
د لوبې په ۷۲ مه دقیقه کې بیا د انګلنډ کول پالمر د انګلنډ له لوري ګول وکړ او سیالي یې په یوه- یوه ګول برابره کړه. خو مایکل اویارزابیل د لوبې په ۸۶ مه دقیقه کې د اسپانیا لپاره  ګټونکی ګول وکړ او لوبډله یې د یو په مقابل کې په دوو ګولونو مخکې شوه د الوبه د جرمني په برلین کې ترسره شوه.
انګلنډ لوبډله پایلوبې ته هالنډ ته د یو مقابل کې له دوو ګولونو ورکولو وروسته رسېدلې وه.
اسپانیا بیا درې ځله د دې سیالیو اتله لوبډله پاتې شوې.
د ۲۰۲۴ کال اروپايي اتلولیو کې د اسپانیا له لوري ځوان لوبغاړی لامین یامال خورا ښه وځلېد، چې د پایلوبې له پیل یوه ورځ مخکې ۱۷ کلن شو. دی تر ټولو کم عمره لوبغاړی شو، چې په اروپايي سیالیو کې د اسپانیا لپاره ولوبېد.
انګلنډ لوبډلې له ۱۹۶۶ راهیسې د فوټبال کومې مهمې سیالۍ پایلوبه نه وه ګټلې او د دې لوبډلې روزونکی ، ګارېت ساوتګېټ لومړی ځل وتوانید لومړی ځل له هېواده بهر د اروپايي اتلولیو پایلوبو او د یوې مهمې لوبې پایلوبې (یورو او نړیوال جام نیمه پایلوبې) ته ورسوي.
انګلنډ لوبډله د اروپا اتلولیو کې له دې مخکې دوه ځله له اسپانیا سره مخامخ شوې او دواړه ځله انګلنډ لوبډله بریالۍ شوې وه. نننۍ سیالۍ د دې دواړو لوبډلو تر منځ د اروپايي اتلولیو په سیالیو کې درېیمه هغه وه، چې اسپانیا وګټله.

افغان ملي لوبډله نن تر یوې سختې مقابلې وروسته د بنګله دیش کرکټ ملي لوبډلې ته په ماتې ورکولو، دنړیوال جام سیمی فاینل ته ووته.

دافغان کریکټ په تاریخ کې دا لومړی ځل دی چې افغانستان د شل اوریز جام نیمه‌پایلوبې ته لاره مومي.

دغه لوبه چې د کریکټ ۲۰ اووریز نړیوال جام ۵۲ لوبه وه ، دافغان لوبډلې په توپوهنه پیل شوه چې په ټاکل شویو شلو اوورنو کې د ۵ لوبغاړو په سو ځیدو ،افغان لوبډلې بنګله دیش ته د۱۱۶ منډو هدف وتاکه.

بنګله دیش ټیم په ځواب کې د ټولو لوبغاړو په سوځیدو ۱۰۵ منډې جوړې کړې.

د افغانستان لوبډلمشر راشد خان له لوبې وروسته خبري غونډې ته وویل: “د یوې لوبډلې په توګه نیمه‌پایلوبه زموږ لپاره یوه هیله وه، دا ټول په دې پورې اړه لري چې موږ څنګه سیالۍ پیل کړه او څه باور مو ترلاسه کړ.

“دا د باور وړ نه ده. هرڅوک ‌ډېر خوشحاله دي، چې موږ په نیمه‌پایلوبه کې پاتې شوو.

راشد خان نن د افغان لوبډلې په ګټه عالي توپ اچونه وکړه او په خپلو ۴ اورونو کې یې د ۲۳ منډو په بدل کې د سیالې لوبډلې ۴ لوبغاړي له ډګره بهر کړل، همدا راز نوین الحق هم د بنګله‌دېش څلور تکړه لوبغاړي له لوبې وایستل.

اندیا ،انګلیند او سویلي افریقا به په نیمه پایلوبه کې له افغانستان سره سیالي وکړي.