د حماس تر کنټرول لاندې عامې روغتیا وزارت مسوولین وايي، د شنبې تر نیمايي ورځې پورې په ۲۴ ساعتونو کې په غزه کې د اسرائیلي اشغالګرو ملېشو په بریدونو کې لږ تر لږه ۸۱ فلسطینیان شهیدان او له ۴۰۰ ډیر ټپیان شوي دي.
د الشفا روغتون کارکوونکو او عیني شاهدانو خبري اژانسونو ته وویل، په یوه پیښه کې چې د غزې ښار په یوه لوبغالي رامنځته شوه، د ماشومانو په ګډون لږ تر لږه ۱۱ کسان ووژل شول.
دغه لوبغالی د هغو بې ځایه شویو خلکو د استوګنې لپاره کارول کېده چې هلته په موقتو کېږدیو کې ژوند کوي.
یو عیني شاهد وايي، دوی هلته ناست وو، چې ناڅاپه پر سړک یوه لویه چاودنه وشوه.
احمد قیشاوي رویټرز خبري اژانس ته وویل: “دا سیمه له خیمو ډکه وه، اوس خیمې تر خاورو لاندې دي. موږ په خپلو خالي لاسونو تر ساعتونو پورې کېندنې کولې.”
دی زیاتوي: ”دلته نه مطلوب کسان شته او نه هم ترهګر، هغسې چې دوی (اسرائیلیان) ادعا کوي، بلکې یوازې ملکي خلک او ماشومان دي، چې په بې زړه سوي توګه په نښه شول.”
د المواسي سیمې اپارتمانونو پر یوه بلاک او یوې خیمې بریدونو کې د ۱۴ نورو کسانو وژل کېدو رپوټونه ورکړل شوی، چې ویل کېږي، ځینې یې ماشومان دي.
سهیونیستي اشغالګرو (ای ډي ایف) تر اوسه د دې بریدونو په تړاو څه نه دي ویلي، خو د شنبې په ماښام یې یوه اعلامیه کې ویلي، د جمعې پر ورځ یې د غزې ښار په صبرا سیمه کې د حماس پوځي څانګې یو لوړ پوړی غړی حخم محمد عیسی العیسی وژلی دی.
اشغالګر ادعا کوي چې العیسی د حماس پوځي څانګې له بنسټ اېښودونکو غړو څخه یو و، د حماس د عمومي امنیت شورا غړی و او پر اسرائیل یې د حماس ۷ اکتوبر ۲۰۲۳ برید “پلان جوړولو او پلي کولو کې مهم رول” لوبولی و.
اسرائیلي اشغالګرو د اکتوبر هغه برید په ځواب کې پز غزه بمبارۍ پیل کړې، چې په کې شاوخوا ۱۲۰۰ کسان ووژل شول او ۲۵۱ نور یرغمل شول.
د حماس د روغتیا وزارت په وینا، له هغه راهیسې په غزه کې له ۵۶۰۰۰ څخه ډېر کسان وژل شوي دي.
،د جمعې ورځې له اسرائیلي بمبارۍ وروسته خلک او خیمې تر خاورو لاندې شوي.
د المواسي سیمې په برید کې درې ماشومان او د هغوی مور او پلار ووژل شول، چې خپلوانو یې اسوشیټیډ پریس خبري اژانس ته ویلي، په خوب ویده وو، چې وژل شوي دي.
د شنبې پر ماسپښین د جعفا ښوونځي ته نږدې تفاح سیمه کې د هوایي برید پایله د یو شمېر کسانو وژل کېدو رپوټونه ورکړل شوي. دا هغه ځای دی، چې د غزې سلګونه بې ځایه شویو خلکو پکې پناه اخیستې.
د فلسطین عامې روغتیا وزارت مسوولین وايي په دې برید کې لږترلږه اته کسان ووژل شول، چې پنځه ماشومان هم پکې شامل وو.
روغتیايي چارواکي وايي، چې امبولانس او د مدني دفاع عمله د لارو ویجاړېدو له کبله هغو قربانیانو په رسېدو کې له ستونزو سره مخامخ وو، چې په کنډوالو کې ایسار پاتې وو.
په ورته مهال، د امریکا ولسمشر ډونلډ ټرمپ ویلي، هیله من دی چې په راتلونکې اونۍ به اوربند وشي.
قطري منځګړي وايي، دوی هیله لري چې د امریکا فشار به د اسرائیل او ایران ترمنځ له اوربند وروسته، چې د دواړو هېوادونو ترمنځ ۱۲ ورځنۍ شخړه پای ته ورسېده، یوه توافق ترلاسه کړي.
په مارچ میاشت کې یو دوې میاشتنی اوربند هغه وخت مات شو، چې اسرائیلي ځواکونو پر غزه تازه بریدونه پیل کړل. هغه اوربند چې د جنوري پر ۱۹مه پیل شوی و، د درې پړاوونه درلودل، خو له لومړي پړاوه هم تېر نه شو.
د هغې هوکړې په دویم پړاو کې دایمي اوربند، په اسرائیل کې د فلسطیني بندیانو خوشي کېدو بدل کې په غزه کې د ژوندي پاتې یرغمل شویو کسانو بېرته ستنیدل او له غزې نه د اسرائیلي ځواکونو بشپړ وتل شامل وو.
پر پنجشنبه د حماس یوه لوړ پوړي چارواکيوویل، منځګړو په غزه کې د نوي اوربند او د یرغملو خوشي کېدو توافق لپاره خپلې هڅې ګړندۍ کړې دي، خو له اسرائیل سره خبرې لا هم په ټپه ولاړې دي.
بل لور د شنبې پر ماښام په تل ابیب کې یوه لاریون شوی، چې په کې د حماس لخوا په غزه کې د پاتې یرغمل اسرائیلیانو د خوشي کېدو لپاره د یوې هوکړې غوښتنه وشوه. منتظیمینو شعارونه ورکول: “د جګړې پای ته رسولو او په یوه پړاو کې د ټولو (یرغملو) کورونو ته ستنېدو وخت راغلی دی”.
