تهران کې د اسمعیل هنیه وژل کیدل

د ایران سپاه پاسدارانو په تهران کې د حماس د  د سیاسي دفتر د مشر اسماعیل هنیه د وژل کیدو خبر تایید کړی دی.

د سپاه پاسدارانو د عامه اړیکو دفتر په وینا نن  په تهران کې د اسماعیل هنیه پر استوګنځي برید شوی او په دې پېښه کې نوموړی او د هغه یو ساتونکی وژل شوی دی.

دغه اعلاميه د دې پېښې په اړه نور څه نه دي ويلي او يوازې وايي چې د پېښې د لامل او ابعادو په اړه بپلټنې کوي.

له دغې پېښې یوه ورځ مخکې ښاغلی هانیه په تهران کې د ایران د ولسمشر مسعود پژشکیان د لوړې په مراسمو کې له هغه او د اسلامی جمهوریت له لارښودعلی خامنه ای سره وکتل.

ښاغلي پزشکیان له اسماعیل هنیه سره په کتنه کې ډاډ ورکړی و چې له حماس ډلې سره د اسلامي جمهوري رژیم ملاتړ به له دې وروسته هم په لا زیات قوت  سره دوام وکړي.

اسماعیل هنیه له علي خامنه اي سره په کتنه کې د غزې جګړې ته په اشارې سره چې اوس یې له پیل څخه درې سوه ورځې تیرې شوي، ټینګار وکړ چې دا جګړه یوه “نازک او تاریخي پړاو” ته رسېدلې ده او د حماس ځواکونه باید خپله اتلولي ثابته کړي.

حماس هم په یوه بیان کې د مسعود پزشکیان د لوړې په مراسمو کې د ښاغلي هنیه حضور ته په اشارې سره ویلي چې اسرائیلو هغه په ​​نښه کړ.

د حماس یو جګپوړی چارواکی وايي، د دې ډلې د سیاسي دفتر د مشر اسماعیل هنیه وژنه به بې ځوابه پاتې نه شي.