افغانستان کرېکټ ملي لوبډله د شل اوریز نړیوال جام ګروپ سیالیو په لړ کې نن سهار وختي  پاپوا نیو ګیني (پي این جي) کرېکټ لوبډلې ته د ۷ ویکیټو په توپیر ماتې ورکړه او کوارترفاینل ته ووته

لوبه سهار دافغانستان پر مهال ۵بجې او ۳۰ دقیقې پیل شوه چې  پی  ان جي لوبډلې د ۱۹ اعشاریه پنځه اوورونو تر پایه پورې ۹۵ منډې و کړې، ټولې وېکټې یې له لاسه ورکړې او افغانستان ته یې د ۹۶ منډو هدف وټاکه.

خو افغان لوبدلې بیا یوازې د ۳ ویکیټو په سوځیدو،ټاکل شوی هدف د ۱۶ اوور په پیل کې ترلاسه کړ.

ګلبدین نایب ۴۹ منډې وکړې او ناسوځیدلی پاتی شو.فضل حق فاروقي د نن لوبې غوره لوبغاړی وبلل شو. نوموړي ۱۶ منډې ورکړې او درې وېکټې یې ترلاسه کړې.

دافغانستان توپوهنه ښه پیل نه شوه او ابراهیم ځدراڼ له هېڅ منډې پرته لومړی افغان لوبغاړی و، چې د لوبې په دویم اوور کې یې وېکټه له لاسه ورکړه. په درېیم اوور کې رحمان الله ګوربز د ۱۱ منډو له جوړولو وروسته وسوځېد. د لوبې په نهم اوور کې عظمت الله عمرزي د ۱۳منډو له جوړولو وروسته خپله وېکټه له لاسه ورکړه. خو له دې وروسته تجربه کارو افغان لوبغاړو محمد نبي او ګلبدین نائب خورا ښه ملګرتیا وکړه او تر بریا پورې دواړه ناسوځېدلي پاتې شول.

دافغانستان راتلونکې لوبه له ویست اندیز ملي لوبډلې سره ده خو دواړه لوبډلې وار د مخه دکوارتر فاینل پړاو ته ختلي دي.