په لس هاوو زره خلکو د امریکې ولسمشر دونالد ټرمپ د پالیسیو پر ضد په مختلفو ایالتونو کې لاریونونه پیل کړي دي.
د لاریونونو غوښتنه د ۵۰۵۰۱ غورځنګ لخوا ورکړل شوې وه، چې معنی یې د امریکا په ۵۰ ایالتونو کې د ۵۰ لاریونونو غورځنګ دی
د بهرنیو رسنیو د راپورونو له مخې، نن د امریکا په مختلفو ایالتونو کې د ولسمشر ټرمپ د پالیسیو پر ضد لاریونونه روان دي، چې ګڼ شمېر خلک پکې ګډون لري.
د راپور له مخې، لاریون کوونکو په واشنګټن ډي سي کې هم په لوی شمیر کې راټول شوي دي، دغه راز د نیویارک او فلوریډا په ګډون په بیلابیلو ځایونو کې هم لاریونونه پیل شوي دي.
د امریکايي رسنیو په وینا، په واشنګټن ډي سي او د امریکا په نورو ښارونو کې د ټرمپ پر ضد د لاریونونو غوښتنه د ۵۰۵۰۱ غورځنګ لخوا شوې ده. ۵۰۵۰۱ د امریکا په پنځوسو ایالتونو کې د پنځوسو لاریونونو غورځنګ استازیتوب کوي.
د راپور له مخې، د لاریونونو تنظیموونکي وايي چې دوی د ټرمپ ادارې د غیر ډیموکراټیکو او غیرقانوني اقداماتو پر وړاندې د لاریونونو غوښتنه کړې ده.
