نامتو اسراییلي جنرال (یسرایل زیف ) وایی د غزې جګړه یو عادلانه جګړه وه چې په دوکې بدله شوه
پر نتانیاهو باندی د پرله پسې نیوکو په دوام دا ځل، د متقاعد جنرال یسرایل زیف لخوا نوې نیوکې مطرح شوي دي.
زیف چې له یوې خوا یو اسراییلي جنرال دی (چې په خورا بې رحمۍ سره د غزې پر اوسېدونکو باندی بریدونه کړي دي)،دغه جګړه په لومړي سر کې اړینه اوعادلانه بولي خو وايی چې وروسته د دوکې په یوه وسیله باندې اوښټې ده .هغه په یوه مقاله کې چې د یکشنبې په ورځ د اپریل په 17 د اسراییلو په “چینل 12” ویب پاڼه کې خپره شوې، لیکلي چې په غزه کې جګړه په لومړي سر کې اړینه وه، مګر بالاخره په سیاسي او بې ګټې جګړه بدله شوه. د لیکوال په وینا، “دا یو عادلانه جګړه وه چې په دوکې بدله شوه.”نوموړي په سوریه کې د اسراییلو پر هوايي بریدونو هم نیوکه وکړه او خبرداری یې ورکړ چې دا بریدونه ښايي د لبنان حزب الله ته ورته وسله والې ډلې رامنځته کړي.
برسېره پردې، زیف د پوځي عملیاتو له لارې په غزه کې د یرغمل شویو او نیول شویو اسراییلي سرتیرو د بیرته راستنیدو احتمال کم وباله او ټینګار یې وکړ چې د بندیانو بیرته ستنیدل د جګړې پای ته اړتیا لري؛ که نه نو، د دوی د خوشې کولو لپاره یوې موافقې ته د رسیدو هڅې به ناکامه شي.
یاد اسراییلی جنرال د جګړې دوام هم د عامه افکارو د اړولو لپاره یوه دسیسه ګڼلې، چې د نتانیاهو په ګټه ده، ځکه چې دا هغه ته اجازه ورکوي چې په ستره محکمه کې خپله اوریدنه وځنډوي او ځینې چارواکي له دندې ګوښه کړي.
په زړه پورې خبره داده چې دغه وتلی اسراییلي جنرال دغزې او فلسطین دخلکو ننګه نه کوي بلکې غواړي اسراییلي ولس پر دي واقعیت باندی پوه کړي چې روانه جګړه داسراییل اوږد مهالې ګټې چلنج کوي.په دی مانا چې دغه سیاسي شعور اوس په اسراییلو کې د ودې په حال کې دی چې دصهیونیست حکومت چلند،نور داسراییلي ولس ګټې نه شي ساتلای.
دغه جنرال او داسراییلو نور سیاستپوهان چې دنتانیاهو له روانو اقدامتو سره مخالف دي،نه دبشري حقوقو خبره کوي او نه هم دجنګي جنیاتونو بحث را پورته کوي چې هره ورځ داسراییلي پوځیانو له خوا ترسره کیږي.دیادو جنرالانو او سیاستپوهانو محاسبه ،پوځی او سیاسي محاسبه ده.هغوی پوه شوي دي چې اسراییل دغه جګړه نه شي ګټلای خو نتانیاهو تر دی دمه نه پرې پوهيږي.هغوی وینې چې داسراییلو اقتصاد ورځ تر ورځې کمزوری کیږي خو نتانیاهوتری سترګې پټوي.
د شباک پخواني مشر رونن بار هم سترې محکمې ته په یوه لیک کې لیکلي چې نتانیاهو یې ځکه له دندې ګوښه کړی چې سترې محکمې ته یې د راپور لیکلو لپاره د نتانیاهو غوښتنه رد کړې او اعلان یې کړی چې د هېواد امنیتي وضعیت د لومړي وزیر د محاکمې اجازه نه ورکوي.
په دی توګه کتل کیږي چې دنتانیاهو پلمې او دوکې نور نه شي کولی داسراییل سیاستوال او خلک وغولوي.
اسراییلیان ورو ورو پر دی واقعیت باندی پوهیږي چې روانه جګړه اسراییلو ته هیڅ ګټه نلري بلکې ریانونه به یې د کلونو پورې داسراییلیانوپرژوند باندی اغېزولري.
هغوی پوهیږي چې دبریدونو او بمباریو پایله دا ده چې په هره خاوره او هر ګوټ کې به داسراییلو پرخلاف عملیاتي ډلې جوړې شي او هر چېرته اسراییلي اتباع په نښه کړي.لکه چې حزب الله داسراییلو پرخلاف دمبارژې لپاره جوړ شوی دی،نور ګوندونه به هم په هره خاوره کې جوړشي او هر یو به یې اسراییلو ته دسر درد وي.
دا دیو خاموش انقلاب پیلامه ده چې دنتانیاهو دجنایتکارې ادارې پرخلاف داسراییلی ولس دسترغبرګون په پایله کې به دهغه هېواد سیاسي برخلیک بدل کړي.
