کرملین وایی چې نشي کولی د جګړې پای ته رسولو لپاره د متحده ایالاتو وړاندیزونه ومني ځکه چې دوی هغه اندیښنې له پامه غورځوي چې مسکو یې د دواړو هیوادونو ترمنځ د شخړې اصلي لاملونه ګڼي.
د رویټرز په وینا، د روسیې د بهرنیو چارو مرستیال وزیر سرګي ریابکوف د سې شنبې په ورځ د مسکو او واشنګټن ترمنځ په خبرو اترو کې د پرمختګ نشتوالي ته په اشارې سره ټینګار وکړ چې د امریکا وړاندیزونه د هغو بنسټیزو مسلو لپاره حل لارې نلري چې روسیه یې اندېښمنه کړې ده.
د روسیې ولسمشر ولادیمیر پوتین مخکې د امریکا د وړاندیزونو د بیاکتنې غوښتنه کړې وه او شرایط یې وړاندې کړي وو. چې ناټو کې د اوکراین نه شاملېدل، د ختیځ اوکراین په څلورو سیمو کې د روسیې د بشپړ کنټرول،پیژندل، او د اوکراین پر پوځ محدودیتونه شامل وو. خو کیف دا غوښتنې مسکو ته تسلیمېدل ګڼۍ.
په عین حال کې، د امریکا ولسمشر ډونالډ ټرمپ په وروستیو اونیو کې د مسکو پر وړاندې سخت دریځ غوره کړی دی. ترامپ وایی د روسیې لخوا د سولې د تړون د احتمالي خنډ پرسر غوسه دی. ټرمپ ګواښ کړی چې که اوسنی وضعیت همداسې دوام وکړي، نو پرهغو هېوادونو به بندیزونه ولګوي چې له روسیې څخه تیل اخلي.
د ټرمپ د نویو دریځونو په اړه، د کریملین ویاند دیمیتري پیسکوف وویل چې له متحده ایالاتو سره اړیکې دوام لري، خو ټینګار یې وکړ چې د بحث لاندې موضوع “ډیره پیچلې” ده او دوه چنده هڅو ته اړتیا لري.
په ورته وخت کې، د روسیې د بهرنیو چارو وزیر سرګي لاوروف وویل چې مسکو د اوکراین د انرژۍ پر تاسیساتو د بریدونو د بندولو لپاره په بشپړه توګه ژمن دی، او امریکایي چارواکو ته یې د اوکراین له خوا د ادعا شویو سرغړونو لیست چمتو کړی دی.
د رویټرز په وینا، سره له دې چې ټرمپ د روسیې او اوکراین ترمنځ د سولې موافقې ته د رسیدو لپاره هڅې کوي، خو داسی ښکاري چې دریځ یې ورو ورو دمسکو پرخلاف سختېږي.
