ولسمشر ټرمپ د اسرائیل او ایران تر منځ پراخېدونکې کړکېچ کې مداخله وکړه، یو لوی قیمار یې وواهه، خو په ظاهره دا خطر د اوس لپاره د هغه په ګټه ښکاري.
د سې شنبې پر شپه ولسمشر ټرمپ اعلان وکړ، چې ایران او اسرائیل د اوربند په هکله توافق کړی او دا پرمختګ په راتلونکي کې د دوام لرونکې سولې لپاره لار هوارولای شي.
که څه هم ایران او اسرائیل په څرګند ډول دا توافق نه دی تائید کړی، خو د سپینې ماڼۍ چارواکي دا د پردې تر شا یوه لویه بریا بولي.
که ولسمشر ټرمپ وتوانېږي چې دا کړکېچ ختم کړي، چې دی یې ”۱۲ورځنۍ جګړه” بولي، نو دا به ټولې سیمې ته د یوې پراخېدونکې جګړې مخنیوي ګټور ګام وي او هغه هم داسې مهال چې امریکا پر شنبه د ایران اتومي تاسیسات بمبار کړل او داسې اندېښنې ډېرې شوې وې، چې ښايي امریکا په دېکړکېچ کې نوره هم ښکېله شي.
د اوربند په هکله د ټرمپ په پیغام کې ویل شوی و: “له هغې انګېرنې سره چې هر څه داسې کار وکړي، چې باید یې وکړي، چې کوي به یې، زه غواړم دواړو هېوادونو ته مبارکي ووایم.”
د امریکا ولسمشر د اسرائیل-ایران کړکېچ ته د “۱۲ ورځنۍ جګړې” نوم ورکړی.
ټرمپ په خپل پیغام کې لیکلي: “دا یوه داسې جګړه وه، چې کېدای شي تر کلونو پورې یې دوام کړی وای او کېدای شي ټول منځنی ختیځ یې ویجاړ کړی وای، خو داسې و نه شول او هیڅکله به داسې و نه شي!”
له بلې خوا په تهران کې عیني شاهدانو د بي بي سي فارسي څانګې ته ویلي، له ځايي وخت سره سم د ګهیځ له څلورو بجو راهیسې یې د چاودنو او دافع هوايي ډزو غږونه نه دي اورېدلي.
دا په داسې حال کې ده، چې له دې مخکې په تهران، کرج او رشت ښارونو کې د درنو چاودنو غږونه اورېدل کېدل.
