دامریکې ولسمشر دونالد ترمپ له خوا دغزې دتخلیې پلان دافغانستان اسلامي امارت،ملګرو ملتونو او پاکستان له خوا وغندل شو.
د اسلامي امارت د بهرنیو چارو وزارت د یوې اعلامیې په خپرولو سره د غزې د خلکو د ایستلو او نورو هیوادونو ته د هغوی د بیا میشته کولو په اړه د امریکا د ولسمشر څرګندونې وغندلې او دا یې د نړیوال قانون څخه ښکاره سرغړونه وبلله. په بیان کې ټینګار شوی چې غزه د فلسطین خاوره ده او هیڅ هیواد د دوی د برخلیک ټاکلو حق نلري. اسلامي امارت دا پلان د صهیونیسټ رژیم د غیرقانوني اهدافو استازیتوب ګڼي او خبرداری یې ورکړی چې دا ډول اقدامات به د سیمې بې ثباتۍ او د تاوتریخوالي د زیاتوالي لامل شي. اسلامي امارت په اغیزمنو او عدالت غوښتونکو هیوادونو هم غږ کړی چې د دې دسیسې په وړاندې ګډ او پرېکنده ځواب ورکړي او ورسره مقابله وکړي.
له بلې خوا دملګرو ملتونو سر منشي انتونيو کوتریش وایی په غزه کې باید د قومي تصفیې مخه ونیول شي د ملګرو ملتونو سرمنشي انتونیو ګوتریش وايي چې د غزې کړکېچ د حل په لټه کې، موږ باید دا نور هم خراب نه کړو. ښاغلي ګوتریس په خپل ایکس پاڼه کې د نړیوالو قوانینو پر رعایت ټینګار وکړ او زیاته یې کړه: “د هر ډول قومي تصفیې مخه باید ونیول شي.” دا په داسې حال کې ده چې پرون د امریکا ولسمشر ډونالډ ټرمپ د اسراییلو له لومړي وزیر بنیامین نتنیاهو سره په لیدنه کې اعلان وکړ چې د غزې اوسیدونکي به نورو سیمو ته انتقال شي او موږ به دا سیمه ونیسو.
دپاکستان د بهرنیو چارو وزارت ویاند شفقت علي خان د اونیزې غونډې په ترڅ کې وویل چې موږ د فلسطینیانو د هیلو سره سم د دوو دولتونو د حل ملاتړ کوو. موږ د هغه څه ملاتړ کوو چې فلسطینیان یې غواړي. ویاند د غزې د خلکو لیږد غیر عادلانه، دردناک او د اندیښنې وړ وباله او اندیښنه یې وکړه چې نړیواله ټولنه باید اسراییل په غزه کې د خپلو جنګي جرمونو مسؤل وګڼي. ویاند په غزه کې د اسراییلو ظلمونه په کلکه وغندل او ویې ویل چې د فلسطین په اړه د پاکستان دریځ خورا روښانه دی. پاکستان د فلسطیني خلکو سره ولاړ دی او د فلسطینانو د خپلواکۍ د حق لپاره د مبارزې ملاتړ ته به دوام ورکړي.
