د ایران د سپاه پاسداران بېلابېلو مشرانو اسرائیل او امریکا ته تازه ګواښونه کړي.
دوی دا ګواښونه د ۱۳۵۸ کال د لړم/عقرب دیارلسمه تهران کې د امریکا سفارت د نیولو کلیزې په مناسبت بېلابېلو غونډو کې کړې دي.
په دې لړ کې د سپاه پاسداران ځواکونو مرستیال علي فدوي په صنعتي شریف پوهنتون کې د یوې پوښتنې په ځواب کې ټینګار کړی چې د اسرائیل د برید ځواب به “خامخا” ورکړل شي. خو هغه په دې تړاو نور جزیات دي ورکړي.
هممهاله د سپاه پاسداران عمومي قوماندان حسین سلامي هم د لړم دیارلسمې په تړاو یوه پیغام کې اسرائیل او امریکا ته ګواښ کړی چې د ایران او “مقاومت جبهې” له خوا به “غاښ ماتوونکی” ځواب وګوري.
هغه ویلي: “د سیمې سلامي مقاومت به… د شرارت جبهې ته غاښ ماتوونکی ځواب ورکړي.”
پیغام کې زیاته شوې “ایران او د مقاومت جبهه به په دې لار کې پر هر هغه شي ځان سمبال کړي چې د دښمن پر وړاندې مقابلې او بریمنې برلاسۍ لپاره ورته اړتیا وي”.
سلامي همدا راز تهران کې جوړو شویو مراسمو ته په خبرو کې ویلي، “موږ به بالاخره هغوی [امریکا او اسرائیل] ته ماته ورکړو، راتلونکې صحنې به دا روښانه کړي… خبرداری ورکوو چې که امریکایان خپل چلند بدل نه کړي، د نابودۍ پر لور به ولاړ شي.”
د سپاه پاسداران مشر زیاته کړې “حزبالله د ماتې په نه خوړلو نه قانع کېږي. هغه غواړي صهیونیستي رژیم او نړیوال پلویان یې د لبنان سویل او اشغال شوي فلسطین کې ښخ کړي.”
له دې سره د ایران ولسمشر مسعود پزشکیان هم د دولتي پلاوي نننۍ غونډه کې ویلي، چې د ایران اسلامي جمهوریت به په هېڅ ډول پر خپل “حریم او امنیت تېری” بې ځوابه پرې نه ږدي.
هغه دا هم ویلي چې که اسرائیلي مشران “خپل چلند ته بیا کتنه ونه کړي، اوربند ونه مني او په سیمه کې د بېګناه او مظلومو خلکو له وژنو لاس وانخلي، نو دا ښايي زموږ د ځواب په بڼې او شدت اغېزه ولري”.
د یادونې ده چې مخکې د ایران مذهبي مشر ایتالله علي خامنهيي هم ویلي و، چې د اسرائیل د تېرې اونۍ هوايي برید ته به غاښ ماتوونکی ځواب ورکړي.
ایران روان کال کې یو ځل پر اسرائیل د لسګونو بالېستیک او کروز توغندیو او چاودېدونکو ډرونونو په وسیله او دویم ځل د نږدې ۲۰۰ بالېستیک توغندیو برید وکړ.
د ایران لومړي برید ته د اسرائیل ځواب نسبتآ محدود و، خو په دویم کې یې تېره اوونۍ د دغه هېواد دفاعي سیستمونه او د بالېستیک توغندیو د تولید تاسیسات په نښه کړل.
ایراني چارواکي له تېرو څو ورځو راهیسې ګواښ کوي چې د اسرائیل برید بې ځوابه نه پرېږدي.
دوی خپل دغه احتمالي غبرګون ” ۳مه رښتېنې ژمنه” بللې ده.
بلخوا د امریکا متحدو ایالتونو بیا منځنيختیځ کې د کړکېچ ډېرېدو ته په کتو سیمې ته بي-۵۲ بم غورځونکې استولې.
د امریکا دفاع وزارت په یوه بیان کې ویلي، که ایران یا یې نیابتي ځواکونه سیمه کې امریکايي وګړي یا ګټې په نښه کړي، نو “متحدو ایالتونه به د خپلو خلکو دفاع لپاره هر ډول ګام اوچت کړي.”
هممهاله رپوټونه وايي، چې سیمه کې د امریکا پوځ د مرکزي قومندانۍ (سېنټکام) قوماندان مایکل کوریلا د اسرائیل د پوځ له لوی درستیز هرتزي هالوي سره کتلي.
اسرائیلي رسنۍ وايي په دې لیدنه کې د سیمه ییزو، په ځانګړې توګه د ایران له اړخه د پېښو ګواښونو په تړاو خبرې شوې.
د یادونې ده چې ایران کې د اسرائیل د تېرې اوونۍ د پوځي عملیاتو مشري هم د اسرائیل لوی درستیز هرتزي هالوي کوله.
