پښتونخوا کې د پولیو واکسین پرټیم دوسلوالو په برید کې ۲تن پولیس وژل شوي دي.

د اورکزیو د پوليسو وياند محمد موسی د یادې پېښې له تائيد سره ویلي، د پوليسو او امنیتي ځواکونو په ځوابي عملياتو کې ‘درې بريد کوونکي هم وژل شوي دي.’

سیمه ییز امنیتي چارواکي وايي د پېښې په ځای کې یې د لټون عمليات پيل کړي دي.

دا پېښې داسې مهال شوې، چې پاکستان پرون (دوشنبه) د پولیو یا ګوزڼ ضد کمپاین پیل کړی.

د چارواکو په وینا په خیبر پښتونخوا کې سږ کال د پولیو په مثبتو پېښو کې د پام وړ زیاتوالی راغلی دی. داسې اندېښنې دي چې دا ډول تاوتریخوالی به د نورو ننګونو ترڅنګ د کمپاین په بریالي ډول ترسره کېدل هم له ګواښ سره مخ کړي.

په پاکستان کې روغتیايي مسؤلین وايي، په روان ۲۰۲۴ کال کې په پولیو ناروغۍ د اخته ماشومانو شمېر ۴۰ ته رسېدلی، تر ټولو وروستۍ پېښه تېره اونۍ د خیبر پښتونخوا په کوهاټ کې ثبت شوې وه.

سږ کال په پاکستان کې تر ټولو زیاته ځپل شوې صوبه بلوچستان ده چې ۲۰ پېښې پکې ثبت شوې دي. په سند کې ۱۲ او په خیبر پښتونخوا کې پنځه پېښې ثبت شوي، په داسې حال کې چې پنجاب او اسلام اباد کې یوازې د یوې یوې پېښې راپور ورکول شوی دی.

په وروستیو کلونو کې د پولیو څو واکسیناتوران او د هغوی امنیتي ساتونکي د وسله والو تر بریدونو لاندې راغلي. سږ کال د واکسیناسیون په کمپاینونو کې لږ تر لږه ۱۵ کسان چې ډېری یې پولیس دي وژل شوي او لسګونه نور ټپیان شوي دي.

د روغتیا نړیوال سازمان سږ کال په افغانستان کې هم د پولیو لږ تر لږه ۱۸ پېښې تائید کړي، چې ډېری یې د هېواد په سوېل کې دي.

پوليو، يوه ساري ناروغي ده چې د کوچنيانو په منځ کې د فلج کېدو لامل کېږي. په نړيواله کچه د لسيزو اوږد واکسين کولو وروسته له منځه وړل شوې ده.

د بلوچستان په پنجګور کې هم د وسله والو په برید کې پنځه تنه وژل شوي دي

د بلوچستان په پنجګور ضلع کښې د نامعلومه وسله والو په ډزو کې پنځه کسان مړه او دوه ژوبل شوي دي.

د بلوچستان د والي ویاند شاهد رند وايي، برید پر هغو کسانو شوی، چې د یوه بند د څارنې په دنده بوخت وو. بريد کې درې وژل شوي او دوه ټپیان د پنجګور ضلعې اوسېدونکي دي.

د بلوچستان وزير اعلي مير سرفراز بګټي د پېښې غندنه کړې او ويلي یې دي، ترهګر به هېڅکله خپلو موخو ته ونه رسېږي.