عاصم منیر په لوی لاس ستونزې پراخوي(خلیلزاد)
دپاکستان لوې درستیز،هم پاکستاني ولس او هم ګاونډیو سره اړیکې ترینګلې کړي دي
پخوانی امریکايي دیپلومات او افغان سولې مذاکراتو لپاره د امریکا مخکینی ځانګړی استازی زلمی خلیلزاد وايي د پاکستان د پوځ لوی درستیز جنرال عاصم منیر خپلې ستونزې پراخوي.
خلیلزاد پر خپله اېکس خواله رسنۍ یوه پیغام کې لیکلي: “هغه [عاصم منیر] پاکستان کې تر ټولو محبوب سیاسي مشر [عمران خان] د خیالي تورونو له مخې نیولی، هڅه یې کړې چې د سولهییزو لاریونونو مخه ونیسي او اوس یې د بشري حقونو پر یوې مدافع ډلې ‘پښتون ژغورنې غورځنګ’ بندیز لګولی دی”.
هغه د پاکستان د پوځ مشر تورن کړی چې ګوندې د سیمې په کچه یې له هند سره له تاریخي اړخه د خپل هېواد له خصومت یا تربګنۍ ډکې اړیکې لا پسې خرابې کړې او پر دې سربېره یې اوس په افغانستان کې د طالبانو له واکمن حکومت سره هم توند او تهاجمي دریځ ته مخه کړې ده.
د پاکستان پوځ او حکومت تر اوسه دغو څرګندونو ته غبرګون نه دی ښودلی.
زلمي خلیلزاد مخکې هم د عمران خان د نیول کېدو د ناوړه پایلو په ګډون د پاکستان پر ځینو اړوندو مسایلو تبصرې کړې، خو دا ځل یې ژبه انتقادي او نسبتآ تونده ده.
د یادونې وړ ده چې د شهباز شریف په مشرۍ د پاکستان مخکیني لنډمهاله حکومت د هغه پخوانۍ څرګندونې کم اهمیته بللې او ویلي وو چې دوی د خلیلزاد په څېر خلکو مشورو ته اړتیا نه لري
