سه شنبې د چنګاښ ۲۶ : د افغانستان په ختيځ ننګرهار ولایت کې سختو اورښتونو، توپان او سېلابونو درانه ځاني او مالي زيانونه اړولي دي.
په ننګرهار کې ځايي چارواکي وايي، د بارانونو، ږلۍ او توپانونو لکه کبله تر دې مهاله “۴۰” تنه وژل شوي او له “۲۵۰ تنو” زیات ټپيان دي.
د ننګرهار په مرکزي روغتون کې يوې سرچينې هم بي بي سي ته وويل چې تر دې مهاله ۲۸ تنه مړي او څه باندې ۲۰۰ ټپيان وروړل شوي دي.
د ننګرهار ولايت د اطلاعاتو مشر قريشي بدلون وايي، د دغه ولايت د مرکز جلال اباد، بټي کوټ، سره رود او بهسودو ولسواليو تر څنګ په يو شمېر نورو سيمو کې هم زيانونه اوښتي دي.
د نوموړي په وينا ټپيان د درملنې په موخه د ننګرهار ولايتي روغتون تر څنګ يو شمېر نورو روغتونونو ته هم لېږدول شوي دي.
د بارانونو او توپانونو له کبله په بټي کوټ، بهسودو، سره رود ولسواليو او په مرکز کې سلګونه جريبه ځمکه هم ويجاړه شوې او ولاړ فصلونه يې له منځه وړي دي.
د ځايي رسنيو په وينا د سره رود ولسوالۍ د مستي خېلو په کلي کې د يوه کور د چت راپرېوتو له امله د ښځو او ماشومانو په ګډون پنځه تنه وژل شوي او څلور نور ټپيان دي.
ويل کېږي په ښار او يو شمېر نورو سيمو کې د برېښنا او مخابراتي شبکو ستنې غورځېدلې دي چې له امله برېښنا پرې شوې او په سيمه کې مخابراتي خدمتونه هم له ستونزو سره مخ شوي دي.
افغانستان د نړۍ یو له هغو بې وزلو هېوادونو دی، چې سږ کال د سختو ورښتونو او د طبیعي پېښو له امله سلګونه کسانو ته مرګ ژوبله پکې اوښتې ده.
د یادونې وړده چې څه موده وړاندې د افغانستان په شمال د بغلان ولایت په څو ولسوالیو کې سختو سېلابونو سلګونه کسان ووژل او د کرنیزو ځمکو یوه لویه برخه یې ویجاړه کړه. د دغه هېواد شاوخوا ۸۰ سلنه وګړو ژوند پر کرنه تکیه دی.
