پرافغانستان دپاکستان تازه تورونه

د پاکستان د کورنیو چارو وزیر محسن نقوي وايي، دی له افغانستان  حکومته غواړي چې د تحریک طالبان پاکستان د مشر نور ولي محسود په ګډون د تحریک طالبان پاکستان ټول مشران ونیسي او پاکستان ته یې وسپاري.

دپاکستان دکورنیو چارو وزیر چې یوې خبري غونډې ته یې ویناکوله وویل :

“موږ د افغانستان له موقت حکومت څخه غواړو چې بخت شاه، قاري عبدالله او خان ​​لالا ژر تر ژره ونیسي. په تېره بيا د ټي ټي پي امير نور ولي محسود او کمانډر عظمت الله محسود او د ټي ټي پي نور نور مشران چې هلته شته بايد ژر تر ژره ونيول شي. موږ له افغانستان سره ښې اړیکې غواړو او دا یوازې هغه وخت شونې ده چې دوی موږ ته لاسونه ورکړي او ترهګرو ته اجازه ورنه کړي چې له خپلې خاورې زموږ پر ضد کار وکړي.»

د پاکستان حکومت تر دې مخکې هم څو ځلې ادعا کړې چې د تحریک طالبان پاکستان مشران په افغانستان کې دي او هلته یې ملاتړ کېږي. تحریک طالبان پاکستان دغه ادعا ردوي او وايي چې دوی د پاکستان له نورو ځایونو څخه عملیاتو ته اړتیا نه لري.

دپاکستان ورته تورورنه دافغانستان حکومت له خوا په پرله پسې توګه رد شوي دي .داسلامي امارت مرکزي ویاند ذبیح الله مجاهد او نور چارواکي د پاکستان د ورته ادعاوو په اړه ویلي دي چې پاکستان دخپلو امنیتي کمزوریو پړه پرافغانستان اچوي.

کابل دا هم وایی چې پاکستان دخپلو ادعاوو دثبوت لپاره مقنع اسناد او مدارک نلري.

د روژې په  میاشت کې، چې د مارچ له میاشتې سره سمون خوري، د پاکستان پوځ ادعا وکړه، چې د افغانستان د پکتیا په برمل سیمه کې یې د عبدالله شاه په نوم د تحریک طالبان پاکستان یو مهم قوماندان وژلی دی.

خو په سبا یې دغه قوماندان په یوه ویډیو کې راڅرګند شو چې ښيي چې ژوندی دی او په جنوبي وزیرستان کې ژوند کوي.

د راپورونو له مخې په ۲۰۲۱ او ۲۰۲۲ کلونو کې افغان حکومت څو ځلې د تحریک طالبان پاکستان د استازو او د دغه هېواد د حکومت ترمنځ منځګړیتوب وکړ او د دوی د غونډو کوربه توب یې وکړ.

خو TTP په سپټمبر کې اعلان وکړ چې د پاکستان له حکومت سره اوربند پای ته رسېدلی دی.

اسلامي امارت  وايي چې ټي ټي پي د پاکستان داخلي ستونزه ده او مسوولیت یې باید دوی ته منسوب شي.