په بلوچستان کې د پنجاب ایالت ۷ اوسېدونکي دوسلوالوپه ډزو کې وژل شوي دي.
دپولیسو په په وینا دغه پیښه ،چې یو تن ټپي هم لري، د ګوادر په سربندر سیمه کې شوې ده.
د پولیسو په وینا وژل شویو کسانو د سلماني کار کاوه او د پنجاب خانیوال سیمې اوسېدونکي وو.
د ګوادر سیمې پولیسو مرکز مشر محسن بلوچ بي بي سي ته د ټیلیفون له لارې د پېښې خبر تائید تر څنګ وویل، چې تېره شپه نژدې درې بجې نامعلومو کسانو په یوه استوګنځي کې پر دې کسانو ډزې کړې چې پایله کې یې ۷ کسان وژل شوي او یو ټپي دی.
تر اوسه هیچا د دې پېښې مسوولیت نه دی منلی.
د یادونې ده، چې له دې مخکې د اپریل میاشتې پر ۱۳مه د بلوچستان په نوشکي سیمه کې نامعلومو کسانو په ډزو کې د پنجاب ایالت ۱۱ اوسېدونکي وژل شوي وو او پنځه نور ټپیان شوي وو.
