اسراییل د ملکي وګړو د وژلو لپاره امریکايي بمونه کاروي

دامریکې ولسمشر جوبایډن اعتراف کړی چې اسراییل د ملکي وګړو د وژلو لپاره امریکايي بمونه کاروي
امریکايي ولسمشر خبرداری ورکړی، چې که اسرائیل پر رفح برید وکړي، نو دغه هېواد ته به د امریکا د وسلو د استولو مخه ونیسي.

دا لومړی ځل دی چې د امریکا ولسمشر پر غزې د اسرایلو د بریدونو په اړه داسې خبرې کوي چې غواړي پر تل ابیب فشار راوړي چې پر رفح د برید مخه ونیسي.

اسراییلي چارواکو تر اوسه د بایډن د څرګندونو په اړه غبرګون نه دی ښودلی، خو تر دې مخکې د دغه هېواد لومړي وزیر بنیامین نتنیاهو ویلي وو، چې په رفح کې به پوځي عملیات دوام ولري.

اسراییلو د هوايي بریدونو سربیره خپل ځواکونه د فلسطین په رفح بندر کې ځای پر ځای کړي او دغې سیمې ته د بشري مرستو لاره یې تړلې ده.

متحده ایالات د اسراییلو د وسلو لوی تولیدوونکی دی او دا پروسه یې وروسته له هغه ګړندۍ کړه چې حماس پر دغه هیواد برید وکړ او اسرایلو پر غزې بریدونه پیل کړل.

په هرصورت، جو بایډن وویل چې د اسراییلو د دفاع لپاره کارول شوي وسلې لکه د اوسپنې ډوم ضد توغندیو سیسټم به دوام ومومي.

تر دې مخکې امریکايي چارواکو تایید کړې وه، چې واشنګټن د ملکي وګړو د زیان د احتمالي خطر له امله د بمونو لېږدول بند کړي دي. په ملګرو ملتونو کې د اسراييلو سفير دا اقدام “ډېر مايوسوونکی” وباله خو ويې ويل چې دا څرګنده ده چې امريکا به اسرائيلو ته د وسلو لېږل بند نه کړي.