اسلامي دولت نومې ډلې وسله وال ”له پاکستانه افغانستان ته اوړي(دفاع وزارت)
په یوه داسې سیمه کې چې د پاکستان پوځ تر کلک امنیتي پوښښ لاندې ده د چیني اتباعو وژل کیدل د پاکستاني امنیتي ارګانونو کمزوري او یا هم له حمله کونکو سره همکاري په ډاګه کوي
دافغانستان ملي دفاع وزارت وایی چې داعش له پاکستانه افغانستان ته اوړي او پاکستان باید د دی سلې ځواب ووایی .
یاد وزارت پاکستاني پوځ هغه ادعا ”بې مسوولیته او له واقعیته لېرې” بللې چې ویلي یې و، پاکستان کې د وروستیو “ترهګریزو فعالیتونو ریښه” له افغانستان سره تړلې ده.
دملي دفاع وزارت وايي، ”پاکستان کې د ناامنیو پېښو د پړې ګوته افغانستان ته نیول له موضوع له حقیقت څخه د توجه اړولو ناکامه هڅه ده.”
له دې مخکې د پاکستاني پوځ ویاند تورنجنرال احمد شریف پر سې شنبه یوې خبري غونډې ته وینا کې وویل، پاکستان کې د نامنیو ریښه په افغانستان کې ده او په خبره یې دا د دوحې له لاسیک شوي تړونه د افغانستان د “موقت حکومت [د طالبانو حکومت] ښکاره سرغړونه” ده.
احمد شریف دا ادعا هم وکړه چې په داسو سیمه کې پر چینايي انجینرانو په ځانمرګي برید کې د ښکېلو کسانو کړۍ هم له افغانستان سره تړاو لري “ترهګر او د هغوی تسهیلوونکي له افغانستانه کنټرولېدل، په داسې حال کې چې ځانمرګی هم افغان تبعه و.”
د ملي دفاع وزارت په یوه اعلامیه کې بیا د پاکستاني پوځ ادعا ”په کلکه رد شوې” او د ملي دفاع وزارت ویاند عنایت الله خوارزمي له لوري په یوه ایکس پیغام کې ویل شوي: ”د خیبر پښتونخوا په یوه داسې سیمه کې چې د پاکستان پوځ تر کلک امنیتي پوښښ لاندې ده د چیني اتباعو وژل کیدل د پاکستاني امنیتي ارګانونو کمزوري او یا هم له حمله کونکو سره همکاري په ډاګه کوي چې په دواړو صورتونو کي یې مسئولیت د پاکستان حکومت ته متوجه دی.”
په اعلامیه کې دغه راز ویل شوي، چې حکومت چینايي چارواکو ته هم د دې موضوع په هکله ډاډ ورکړی ”او هغوی (چینايي چارواکي) هم په حقیقت پوه شوي دي چې افغانان په داسې موضوعاتو کې ښکېل نه دي.”
د طالبانو دفاع وزارت په اعلامیه کې ادعا شوې، چې د اسلامي دولت نومې ډلې وسله وال ”له پاکستانه افغانستان ته اوړي او د هغوی (پاکستان) خاوره زموږ په ضد کارول شوې او پېښي له هغه هېواد څخه تنظیمېږي چې پاکستان یې باید په اړه ځواب ووايي.
